06.03.2019 21:16

Ábending til þeirra sem nota Reiðhöllina

Eins og margir vinir Reiðhallarinnar hafa tekið eftir er komið nýtt gólfefni í reiðsalinn sem er til mikilla bóta fyrir þá sem sækja námskeið, æfa og keppa í Reiðhöllinni.

Á sama hátt og þegar maður setur nýtt gólfefni á íbúðina heima hjá sér, vill maður auðvitað að það endist sem lengst og verði til prýði. Til þess að það gangi eftir reynir maður að ganga aðeins betur um á nýju gólfefni en maður gerði gjarnan á því gamla.

Það hefur því miður borið á því að einhverjir notendur Reiðhallarinnar hafi ekki haft það að leiðarljósi að ganga vel um nýja gólfefnið í reiðsalnum. Misbrestur hefur verið á því að hreinsa upp skít eftir hrossin þegar námskeiðum eða æfingum er lokið. Það hefur lika borið á því að fólk láti hrossin velta sér í reiðsalnum eftir æfingar.

Allir þeir sem hafa aðgang að húsinu hafa fengið sendar upplýsingar um umgengnisreglur í húsinu. Þeir sem skipuleggja námskeiðin þurfa einnig að brýna fyrir þátttakendum og leiðbeinendum að skila húsinu hreinu af loknum degi.

Til þess að rifja upp fyrir þeim sem ekki muna eftir því hvernig almennar umgengnisreglur eru í Reiðhölliini þá koma þær hér:

1. Notendur hússins skulu sjá til þess að reiðsalurinn sé hreinsaður um leið og hross skilar af sér taði, setja það í hjólbörur og rusl í ruslafötur. Mikilvægt er að spónlagt gólfið sé ávalt hreint.

2. Áður en hross fer inn í reiðsalinn er nauðsynlegt að hreinsa óhreinindi úr hófum, í hesthúsinu eða utandyra.

3. Lausaganga hrossa í reiðsalnum er óheimil. Áríðandi er að hrossin velti sér ekki á gólfinu og kembing hrossa í reiðsal er óheimil.

4. Hreinsa skal stíur í hesthúsi sem notaðar eru og tæma hjólbörur í safnhaug utandyra. Sópa skal ganga hesthússins.

5. Gæta skal að því að slökkva ljós í hesthúsi og sal, ef enginn annar er í húsinu við brottför.

Auk þessa þykir rétt að árétta að óheimilt er að vera með hunda í húsinu og reykingar eru ekki leyfðar innandyra.

Eins og sjá má eru þessar reglur ekki íþyngjandi fyrir notendur hússins. Taka skal fram að enginn starfsmaður er í húsinu til þess að halda því hreinu. Við verðum því að taka höndum saman og vinna saman að því að húsið sé ávalt aðlaðandi við komu.

Félagar í hestamannafélögunum Smára og Loga eru lang stærstu eigendur hússins og það er því akkur okkar að húsið sé ávalt í sem bestu standi.

Ég vona að nýja gólfefnið fái að njóta sín lengi í húsinu og haldi eiginleikum sínum sem best. Göngum vel um og bendum hvoru öðru á ef okkur finnst vera misbrestur á því.

F.h. stjórnar Reiðhallarinnar á Flúðum,
Bjarni H. Ásbjörnsson, formaður.

Flettingar í dag: 44
Gestir í dag: 28
Flettingar í gær: 267
Gestir í gær: 101
Samtals flettingar: 1995558
Samtals gestir: 287707
Tölur uppfærðar: 20.9.2019 01:54:41